Irailaren 26an Euskadi- Brasil Koprodukzio Topaketa egingo dute Donostiako Zinemaldiaren baitan, Industria Jarduerak izeneko atalaren barruan. Bilerak Brasilgo industriarekin harremanak estutzeko balio izango du baita bi herrialdeetako ekoizleek aurkezten dituzten proiektuetarako koprodukzio-aukerak aztertzeko ere. Etxepare Euskal Institutua bertan izango da.

Informazio gehiago hemen

Multimedia Komunikazioa UPV/EHU-EITB masterreko ikasleak Bartzelonara joango dira maiatzaren 20tik 25era Etxepare Euskal Institutuaren laguntzarekin, erreportajeak grabatzera. Kataluniako hiriburuan, Bordeleko Unibertsitateko ikasleekin eta Ramon Llul Unibertsitatekoekin arituko dira elkarlanean.

Bartzelona KulturLab 2012ren irudia

Bartzelonako bizitza kulturalaren beste irudi bat bilatu nahi du proiektuak eta helburu horrekin talde bakoitzak bi erreportaje egin beharko ditu. Ikasleek Ramon Llull Unibertsitateko Komunikazio Zientzien Fakultatea erabiliko dute erredakzio gisa.

Egunero bederatzietan bilera bat izango dute, bertan talde bakoitzak bere erreportajearen nondik norakoak azaldu eta eguneko planning-a aurkeztuko du. Ondoren lanean jarriko dira grabaketekin, postproduzkioarekin…

Sare sozialek komunikabideen munduan hartu duten garrantziaz oharturik, emaitzak Facebook eta Twitterren zabalduko dituzte. Baita eitb.com, lavanguardia.com eta tv3.com hedabideen atarietan ere. Horrez gain, web orri honetan ere emango dugu proiekturen berri, ikasleek egindako kronikekin.

Bordeleko Unibertsitateak hiri bateko bizitza kulturala aztertzeko antolatutako egitasmo batean du sorrera Bartzelona KulturLab-ek. Lehengo urtean Bilbo aukeratu zuten erreportajeak egiteko eta orduan jarri ziren harremanetan Euskal Herriko Unibertsitatearekin. Aurten Bartzelona aukeratu dute bi unibertsitateek eta horren ondorioz, Ramon Llull Unibertsitateko ikasleak izango dituzte ikaskide frantsesek eta euskaldunek.

Et Incarnatus orkestra

Miguel Martín Jazzaldiko zuzendariak azaldu duenez, “jaialdiak bazuen lehendik ere nolabaiteko harremana euskal musikariekin, baina aurten gainera arreta gehiago eskatu ziguten, facebook sarean sortu zuten ekimen baten bitartez. Haiekin bildu eta hainbat proposamen interesgarri sortu dira bertatik, 2011. urtean diskoa kaleratu duten taldeei tokia eskaintzea, esaterako”.

Bertako musikarien partaidetza askotarikoa izango da. Et Incarnatus orkestrak Antony and The Johnsons taldearekin joko du, uztailaren 22an Kursaal Auditorioan eskainiko duten kontzertuan. Egun horretan bertan, Trinitate plazan, Hasier Oleaga-Cantus Caterva musikariek joko dute An Evening with Two Pianos (Kenny Barron, Mulgrew Miller, Eric Reed, Dado Moroni) kontzertuaren lehenengo zatian.

Jaialdiari hasiera emango dion Jazz Band Ballean Travellin’ Brothers Big Band, Triz3ps eta Nevermind Trio + Julen Izarra arituko dira.

Nevermind Trio, Heineken Jazzaldiak aurten martxan jarri duen ekimen bati esker aukeratu dute: aurreko urtean (2011n kasu honetan) disko bat kaleratu duten bost talde euskaldun sartzea programazioan.

Deialdi horren bitartez sartu diren beste lau taldeak honako hauek dira: The Hot Wok, Natalia Calderón Quartet, Gabacho Connection eta RS Factor; eta Kursaaleko terrazetan joko dute guztiek.

Dagoeneko tradizio bilakatu den tokiko taldeen hautaketaren bitartez (egiten den zazpigarren urtea da), hamar dira Heineken Jazzaldian parte hartzeko abagunea izango duten taldeak: Kike Mora Quartet, Donostiako Udalaren Musika eta Dantza Eskolako Big Band-a, Jonathan Hurtado, Javier López Jaso-Marcelo Escrich Quartet, North Atlantic Jazz Connection, Miguel Salvador Quartet, La Prima Janis, Db Trio, Lakuntza Brothers Sexteto eta Ornetillos. Kontzertu horiek Kursaaleko terrazetan (Frigo Gunea, Heineken Terraza, Coca-Cola Gunea) izango dira.

Victoria Eugenia Antzokian uztailaren 20ko gau osoan zehar, hau da, antzokiaren 100. urteurrenaren egunean bertan ospatuko den Gaujazza ekitaldian ere euskal musikariak egongo dira: Just Friends Quintet eta Josetxo Goia-Aribe / Arantxa Díez.

San Telmoko gauetan atzerriko musikariekin egindako hiru elkarlan proiektu aurkeztuko dira, euskal musikariak buru dituztela: Oreka TX, Hyperpotamus eta Gonzalo Tejada.

Nauticool agertokian Aupa Quartet eta euskal disko-jartzaile nabarmenetariko hainbat izango ditugu: DJ Arka, DJ Makala, DJ Punko eta DJ Juan Bazz.

Azkenik, Kutxa Kultur egitasmoaren barruan, beste bost euskal taldek kontzertuak eskainiko dituzte goizez, Agertoki Berdean, uztailaren 21 eta 22an: Inra, Giranice, Peachy Joke, Ras Miguel eta Supersweet.

Mexikoko animazioaren sektoreko ekoizle eta banatzaileekin bilduko dira Etxepare Euskal Institutua eta EIKEN Euskadiko Ikusentzunezkoen Klusterra maiatzaren 28an Etxepareren egoitzan. Maiatzaren 30ean, bestalde, AnimaBasque-Business jardunaldira joango da Bilboko Euskalduna Jauregira Etxepareren ordezkaritza bat. Egun osoan zehar, aurkezpenak, bilerak eta elkarrizketak egingo dituzte. Bi ekintzak hauek lankidetza sustatzeko eta merkatu berrietara zabaltzeko aukera emango dute.

Cesar Sarachu, ezkerretik lehena, Jesusen rolean

Complicité egungo abanguardiako disziplina anitzeko antzerkiaren paradigma da. Simon McBurney zuzendariaren esanetan, euren helburua “testua, musika, irudia eta ekintza uztartzea da, antzerki deseroso eta ezohizkoa lortzeko xedearekin”.

“Istorioak kontatzeari buruzko istorioa” gisa deskribatu du zuzendariak The Master and Margarita, 1928. urtean estalinismoaren kontrolpeko Errusian Mijaíl Bulgákov-ek idatzitako satira.

Cesar Sarachuk Jesusen eta deabruaren rolak antzezten ditu. “Nire bizitza artistikoan sekula egin dudan lanik onena da”, dio. “Obrak duen karga autobiografikoak hunkitzen nau gehien, idazlearen bizitza gogor eta sinestezinarekin duen harreman estua: gaizki tratatutako egilea, arazo fisikoak zituena, hirugarren emaztearekiko azaltzen zuen maitasuna … Eta hori guztia Jesusekin eta Pontzio Pilatorekin, barkamenarekin, ongiarekin eta gaizkiarekin nahasten du”

César Sarachuk (Barakaldo, 1958) UPV-EHU-ko Leioako Kanpuseko Antzerki Tailerrean izan zuen antzerkigintzarekin estreinako kontaktua, Luis Iturrirekin. Handik Basauriko Antzerki Eskolara igaro zen eta Karraka konpainiara gero.

Beka bati esker, Jacques Lecoq-en Eskolan izena emateko aukera izan zuen, eta horrelaxe abiatu zen bere nazioarteko ibilbidea: geroztik, zinean, telebistan eta bereziki antzerkigintzan jardun du lanean,  Londresgo Complicité edota Estokolmoko Unga Klara-Stadsteater  punta-puntako konpainiekin, bokazioa lanbide bilakatuz: “betidanik nozitu izan dut sentimenduak kanporatzeko premia, eszenatokian hori egitea atsegingarri zait”.

Liburuaren azaleko margolana. Aurelio Artetaren "Euskal emakume nekazariak fruta eta barazkiekin" obra.

Gida XVI.mendetik hasten da, Juan de Anchietaren “Kalbarioa” eskulturarekin eta Segio Pregoren “Tetsuo, Bound to Fail” obra multimediarekin amaitzen da, 1998an sortua. Tartean liburuak 180 artisten 224 obra jasotzen ditu. Euskal arteak urte guzti horietan egindako bilakaera ikusteko aukera izango du beraz irakurleak.

Hitzaurreak  dagoeneko ehun urte dituen museoaren historiaren berri ematen du baita instituzioak euskal artearekin izan duen lotura ere. Gaur egungo museoa beste bi museotatik eratorria dela azaltzen du, Arte Eder Museoa eta Arte Modernoko Museoaren baturatik. Biek ere margolari euskaldun bana izan zituzten sorreran zuzendari; Manuel Losada eta Aurelio Arteta bilbotarrak. Ordutik hona, euskal artista garrantzitsuek museoarekin harreman berezia izan dutela diote “Zuloagatik hasi eta Chillidaraino”.

Aurten Etxepare Institutuaren laguntzarekin ingelesezkoa argitaratu bada ere, aurretik bazituen euskarazko eta gaztelaniazko bertsioak.

Humano Caracol 3: Steve Paxton

Humano Caracol saileko lanak hainbat lekutan izan dira ikusgai, besteak beste, Madrilgo Reina Sofia Museoan. Rozasek bere idazketa prozesuaren barnean sartzen ditu lan hauek ere, berarentzat “irudiekin egindako testu praktika moduko bat” baitira.

Gainera, dokumental sortaren lehenengo bi atalek euskarazko azpitituloak dituzte, sortu ziren garaian Arteleku, Koldo Mitxelena Kulturunea eta Donostiako Udaletik jasotako laguntzari esker.

Valladolideko Antzerki eta kaleko Arteen Nazioarteko Jaialdia

Kukai taldeak “Karrikan” ikuskizuna eskeiniko du,  dantzariek “Sorbatza”, “Fight For Fandango” eta “Aupa Mutil” koreografiak egingo dituzte Zigor Lampre DJaren musikarekin. Producciones Gaupasa taldeak, berriz, “Habitos Mundi” lana antzeztuko du. Obrak,  erdiaroko monjeen istorio umoretsua kontatzen du. Bertan, monjeek galbidera daramatzaten “zuloak” garbitzeko mandatua hartzen dute. 2010ean obra honek Leioako Umore Azokaren baitan Euskadiko Kaleko Ikuskizun Onenaren saria jaso zuen.

Maiatzaren 23tik 27ra Valladolideko Antzerki eta Kaleko Arteen Nazioarteko jaialdia burutuko da. Aurtengoa XIII. edizioa izango da eta bederatzi estatutako berrogeita hamar konpainia bilduko ditu. Tartean talde euskaldunak. Kukai Dantza konpainia eta Producciones Gaupasa taldea sekzio ofizialean lehiatuko dira euren ikuskizunekin.